top of page
ວິສະວະກອນກົນຈັກ
ນິຍາມອາຊີບ
ວິສະວະກອນກົນຈັກ ແມ່ນຜູ້ທີ່ອອກແບບເຄື່ອງຈັກ, ຈັດການໂຮງງານ: ອອກແບບຄິດໄລ່ຊິ້ນສ່ວນຂອງເຄື່ອງຈັກ, ຮັບຜິດຊອບໃນການເບິ່ງແຍງເຄື່ອງກົນຈັກໃຫ້ດໍາເນີນໄດ້ຢ່າງປົກກະຕິ.
ຕົວຢ່າງເຊັ່ນ: ໂຮງງານການຜະລິດສິນຄ້າອຸປະໂພກບໍລິໂພກ, ໂຮງງານຜະລິດເຄື່ອງນຸ່ງຫົ່ມເປັນຕົ້ນ.
ການເຮັດວຽກ
ລັກສະນະວຽກ
ລັກສະນະການເຮັດວຽກຂອງວິສະວະກອນກົນຈັກ ຄວາມຈິງແລ້ວຂ້ອນຂ້າງກວ້າງ ເນື່ອງຈາກວ່າວິສະວະກອນກົນຈັກບໍ່ໄດ້ມີຄວາມຮູ້ພຽງແຕ່ກ່ຽວກັບເຄື່ອງຈັກເທົ່ານັ້ນ ແຕ່ຍັງໄດ້ລົງເລິກ ແລະ ສຶກສາກ່ຽວກັບໂຄງສ້າງ, ແຮງ, ພະລັງງານ, ອາກາດ, ລະບົບປັບອາກາດ ແລະ ອື່ນໆ. ຢ່າງໃດກໍຕາມ, ວິສະວະກອນກົນຈັກແຕ່ລະຄົນ ແມ່ນຈະເຮັດວຽກໃນຂົງເຂດທີ່ແຕກຕ່າງກັນອອກໄປ. ວິສະວະກອນກົນຈັກ ແລະ ຊ່າງກົນຈັກແມ່ນມີຄວາມແຕກຕ່າງກັນ, ວິສະວະກອນສ່ວນໃຫຍ່ແມ່ນຜູ້ທີ່ຊີ້ນໍາ ແລະ ວາງແຜນ ສ່ວນຜູ້ທີ່ລົງມືສ້ອມແປງ ແລະ ປະຕິບັດແມ່ນຊ່າງກົນຈັກ.
ໜ້າທີ່ຮັບຜິດຊອບ
-
ຄິດໄລ່,ອອກແບບວ່າເຄື່ອງຈັກຕ້ອງມີລັກສະນະແບບໃດ, ຂະໜາດເທົ່າໃດ, ກໍາລັງແຮງທໍ່ໃດ ເພື່ອໃຫ້ສາມາດຜະລິດສິນຄ້າອອກມາຕາມຄວາມຕ້ອງການ
-
ບູລະນະຮັກສາ,ອອກແບບຮູບການສ້ອມແປງໃນໂຮງຈັກໂຮງງານ
-
ເບິ່ງແຍງ ແລະ ແນະນໍາຊ່າງໃນການບໍາລຸງຮັກສາ ແລະ ສ້ອມແປງເຄື່ອງຈັກ
-
ເຮັດໜ້າທີ່ເປັນຂົວຕໍ່ລະຫວ່າງໂຮງງານຝ່າຍຜະລິດ ແລະ ຊ່າງ ໝາຍຄວາມວ່າເມື່ອຊ່າງສ້ອມແປງໃນບໍລິສັດໃດໜຶ່ງເຮັດວຽກ ແລະ ຄົ້ນພົບວ່າຕົນເອງຂາດອຸປະກອນບາງສ່ວນ ວິສະວະກອນກົນຈັກກໍຈະເປັນຜູ້ເບີກຊື້ວ່າຕ້ອງຊື້ເຄື່ອງຈັກ ຫຼື ອຸປະກອນປະເພດໃດ, ຂະຫນາດທໍ່ໃດເປັນຕົ້ນ.
-
ວິສະວະກອນກົນຈັກທີ່ເຮັດວຽກໃນອາຄານຂະໜາດໃຫຍ່ ບາງຄົນໄດ້ມີການອອກແບບລະບົບທໍ່ນ້ຳ, ລະບົບປັບອາກາດ, ລະບົບສາທາລະນຸປະໂພກ ເປັນຕົ້ນ
ສະຖານທີ່ເຮັດວຽກ
-
ໂຮງງານອຸດສາຫະກຳທີ່ຜະລິດເຄື່ອງຈັກ
-
ໂຮງງານອື່ນໆທີ່ມີການນໍາໃຊ້ເຄື່ອງກົນຈັກ
-
ບໍລິສັດນໍາເຂົ້າ ແລະ ປະກອບຊິ້ນສ່ວນຂອງເຄື່ອງຈັກ
-
ເຂື່ອນໄຟຟ້າ
-
ລົດໄຟລາວ-ຈີນ
ຜູ້ທີ່ຕ້ອງເຮັດວຽກຮ່ວມ
-
ວິສະວະກອນໄຟຟ້າ
-
ວິສະວະກອນອຸດສາຫະກໍາ
-
ວິສະວະກອນວັດສະດຸ
-
ຜູ້ຈ້າງງານ
-
ຜູ້ຈັດການ ຫຼື ຜູ້ຄຸມການຜະລິດ
-
ຊ່າງ
ທາງເລືອກອາຊີບ
-
ອາຊີບວິສະວະກອນກົນຈັກແມ່ນມີທາງເລືອກທາງດ້ານອາຊີບທີ່ຫຼາກຫຼາຍເຊັ່ນ:
-
ສາມາດເຮັດວຽກໃນຂະແໜງອຸດສາຫະກໍາທີ່ຕົນເອງສົນໃຈ ແລະ ສາມາດລົງເລິກໃນດ້ານທີ່ຕົນເອງສົນໃຈ
-
ສາມາດນໍາໃຊ້ຄວາມຮູ້ທີ່ມີເຮັດວຽກໃນສາຍອາຊີບທີ່ໃກ້ຄຽງກັນໄດ້ຄື: ວິສະວະກອນອຸດສາຫະກໍາ ແລະ ວິສະວະກອນວັດສະດຸ
-
ສາມາດນໍາໃຊ້ຄວາມຮູ້ທີ່ມີໃນການເຮັດວຽກໃນຂະແໜງການໄຟຟ້າຝ່າຍຜະລິດ ໂດຍສະເພາະແມ່ນຄວບຄຸມເຄື່ອງຈັກໃນການຜະລິດ
-
ຖ້າຫາກມີທຶນຮອນ ແລະ ມີປະສົບການໃນການເຮັດວຽກດ້ານກົນຈັກ ກໍສາມາດສ້າງຕັ້ງບໍລິສັດ ຫຼື ຮ້ານກ່ຽວກັບການປະກອບ, ນໍາເຂົ້າ ແລະ ຈໍາໜ່າຍກ່ຽວກັບເຄື່ອງກົນຈັກ
ຄວາມກ້າວໜ້າທາງດ້ານອາຊີບ
ການເຕີບໂຕທາງດ້ານອາຊີບ
-
ສາມາດເລື່ອນຂັ້ນເປັນຜູ້ຄຸມງານ
-
ເປັນຜູ້ຈັດການດ້ານກົນຈັກ
-
ເປັນທີ່ປຶກສາວິສະວະກອນກົນຈັກລະດັບສູງ
-
ສໍາລັບບາງຄົນທີ່ມີຄວາມຮູ້ດ້ານການຂາຍ ແລະ ຄວາມຮູ້ດ້ານກົນຈັກ ກໍຈະອອກມາຕັ້ງບໍລິສັດ ຫຼື ຮ້ານເປັນຂອງຕົນເອງ
-
ສາມາດຕັ້ງບໍລິສັດກ່ຽວກັບການປະກອບເຄື່ອງຈັກ ຫຼື ຜະລິດເຄື່ອງຈັກຂະໜາດນ້ອຍໄດ້
ຂັ້ນລາຍໄດ້
ອີງຕາມການສໍາຫຼວດເງິນເດືອນ ແລະ ແນວໂນ້ມການຈ້າງງານປະຈໍາປີ 2022-2023 ຂອງທາງບໍລິສັດ108 Job ແລະ Wise Research ໄດ້ໃຫ້ຮູ້ວ່າອາຊີບວິສະວະກອນກົນຈັກໂດຍສະເລ່ຍແລ້ວມີຂັ້ນລາຍໄດ້ທີ່ຂຶ້ນກັບປະສົບການດັ່ງນີ້ຄື:
-
ຈົບໃໝ່ລາຍໄດ້ສະເລ່ຍ 3.875.000 ກີບ
-
ປະສົບການເຮັດວຽກ 1-3 ປີ ລາຍໄດ້ສະເລ່ຍ 4.055.833 ກີບ
-
ປະສົບການເຮັດວຽກ4-6 ປີ ລາຍໄດ້ສະເລ່ຍ 6.030.000 ກີບ
-
ປະສົບການເຮັດວຽກ 7 ປີ ຂຶ້ນໄປ ລາຍໄດ້ສະເລ່ຍ 12.556.688 ກີບ
ເງິນເດືອນພື້ນຖານ
ແຂ່ງຂັນ ແລະ ຄວາມຕ້ອງການຂອງຕະຫຼາດແຮງງານ
ໃນຂະບວນການພັດທະນາຂອງປະເທດເຮົາ ວິສະວະກອນກົນຈັກໄດ້ກາຍເປັນທີ່ຕ້ອງການຂອງບັນດາໂຮງຈັກ, ໂຮງງານຕ່າງໆ ເນື່ອງຈາກວ່າດ້ານກໍາລັງການຜະລິດກໍຕ້ອງການຜູ້ທີ່ມີຄວາມຮູ້, ຄວາມສາມາດ, ສາມາດອອກແບບ ແລ ະ ຄວບຄຸມເຄື່ອງຈັກໃນການຜະລິດໄດ້ ເພື່ອໃຫ້ການຜະລິດສິນຄ້າຕ່າງໆອອກມາມີປະສິດທິພາບ ແລະ ມີຄວາມປອດໄພກັບພະນັກງານຜູ້ທີ່ເຮັດວຽກຕ່າງໆ.
ຂໍ້ດີ ແລະ ຂໍ້ເສຍ
ຂໍ້ດີ
-
ເປັນອາຊີບທີ່ຕະຫຼາດແຮງງານມີຄວາມຕ້ອງການ
-
ສາມາດນໍາໃຊ້ຄວາມຮູ້ທີ່ມີເຮັດວຽກໃນຫຼາຍຂົງເຂດອາຊີບທີ່ໃກ້ຄຽງໄດ້
-
ໄດ້ຮັບຄ່າຕອບແທນສູງ
-
ມີໂອກາດໄດ້ຮ່ວມວຽກກັບວິຊາການຕ່າງປະເທດທີ່ເກັ່ງ ແລະ ມີປະສົບການ
-
ສາມາດເຮັດວຽກໃນຕະຫຼາດແຮງງານສາກົນໄດ້ ຖ້າຫາກວ່າມີພື້ນຖານຄວາມຮູ້ໃນດ້ານວິຊາການ, ຄວາມຮູ້ກ່ຽວກັບພາສາຕ່າງປະເທດ
-
ການເຮັດວຽກໃນສາຍອາຊີບນີ້ ຕ້ອງໄດ້ມີຄວາມຮັບຜິດຊອບສູງ ແລະ ໃນບາງຄັ້ງອາດມີຄວາມກົດດັນ ໂດຍສະເພາະເມື່ອເຄື່ອງຈັກມີບັນຫາ ຕ້ອງໄດ້ຫາວິທີທາງແກ້ໄຂຢ່າງຮີບດ່ວນ
ຂໍ້ເສຍ
-
ໂຮງງານສ່ວນໃຫຍ່ມັກນໍາເອົາວິຊາການຈາກຕ່າງປະເທດ.ດັ່ງນັ້ນຜູ້ທີ່ປະກອບອາຊີບນີ້ຈໍາເປັນຕ້ອງໄດ້ສະແດງສັກກະຍະພາບຂອງຕົນເອງອອກມາ
ຄຸນສົມບັດທີ່ເໝາະສົມກັບອາຊີບ
-
ມີຄວາມຮັບຜິດຊອບສູງ
-
ມີຄວາມອົດທົນໃນໜ້າວຽກສູງ
-
ມີໃຈມັກ-ຮັກໃນດ້ານເຄື່ອງກົນຈັກ ແລະ ການອອກແບບ
-
ມັກວຽກທີ່ທ້າທາຍ
-
ມີຈັນຍາບັນໃນອາຊີບ
-
ມີໄຫວພິບດີ ແລະ ຊ່າງສັງເກດ
-
ສາມາດເຮັດວຽກພາຍໃຕ້ຄວາມກົດດັນໄດ້ດີ
ທັກສະທີ່ເໝາະສົມກັບອາຊີບ
-
ຕ້ອງມີຄວາມຮູ້ສະເພາະດ້ານ ເຊັ່ນ: ທັກສະດ້ານຄະນິດສາດ, ຟີຊິກ ໂດຍສະເພາະແມ່ນການຄິດໄລ່ການເຄື່ອນທີ່ຂອງເຄື່ອງຈັກວ່າຈະເຄື່ອນທີ່ໄປທາງໃດ, ແຮງງານທີ່ຄວບຄຸມເຄື່ອງຈັກຕ້ອງມີຈັກຄົນ ເປັນຕົ້ນ
-
ຄວາມຮູ້ກ່ຽວກັບການອອກແບບເຄື່ອງຈັກ ແລະ ການຄິດວິເຄາະ, ໜ້າຕາເຄື່ອງກົນຈັກຈະເປັນແບບໃດທັງລະບົບ 2D, 3D
-
ຖ້າຫາກວ່າໄດ້ພາສາຕ່າງປະເທດ ເປັນຕົ້ນແມ່ນພາສາອັງກິດ ແລະ ພາສາທີ 3 ທີ່ກ່ຽວຂ້ອງກັບສະຖານປະກອບການທີ່ຕົນເອງເຮັດວຽກຢູ່ ກໍຍິ່ງມີໂອກາດໃນກາືັດນຮ່ວມມືກັບວິຊາການຕ່າງປະເທດທີ່ມີປະສົບການ
-
ທັກສະດ້ານການນໍາໃຊ້ຄອມພິວເຕີໃນການອອກແບບຕ່າງໆ ແລະ ການຂຽນໂປຣແກຣມເພື່ອຄວບຄຸມເຄື່ອງຈັກ
-
ທັກສະການສື່ສານ
ຄຸນຄ່າຂອງອາຊີບ
ອາຊີບວິສະວະກອນກົນຈັກ ແມ່ນຜູ້ທີ່ອອກແບບຄິດໄລ່, ບໍາລຸງຮັກສາ, ຈັດການໂຮງງານ, ບູລະນະຮັກສາ ແລະ ເປັນຜູ້ເບິ່ງແຍງຊ່າງໃນການສ້ອມແປງ ແລະ ເບິ່ງແຍງເຄື່ອງຈັກເພື່ອໃຫ້ພະນັກງງານຄົນອື່ນໆທີ່ເຮັດວຽກໃນໂຮງງານໄດ້ຮັບຄວາມປອດໄພ.ນອກນັ້ນ, ໃນລະບົບໂຄງສ້າງທໍ່ນໍ້າ ຫຼື ລະບົບອາກາດ ກໍຍັງແມ່ນນັກວິສະວະກອນກົນຈັກເປັນຜູ້ດູແລ, ຄວບຄຸມ ຖ້າຫາກວ່າບໍ່ມີອາຊີບນີ້ໃນການອອກແບບ ຕຶກອາຄານທີ່ໃຫຍ່ໆກໍອາດບໍ່ມີຄວາມໝັ້ນຄົງ ແລະ ປອດໄພໄດ້.
ຊ່ອງທາງການສຶກສາເພີ່ມເຕີມ
ສາຂາທີ່ກ່ຽວຂ້ອງກັບສາຍອາຊີບນີ້ປະກອບມີ:
-
ຄະນະວິສະວະກໍາສາດ, ມະຫາວິທະຍາໄລແຫ່ງຊາດ
ນອກນັ້ນ, ອາຊີບນີ້ຍັງສາມາດສຶກສາທັກສະອື່ນໆທີ່ຈໍາເປັນຂັ້ນພື້ນຖານຕໍ່ການປະກອບອາຊີບວິສະວະກອນກົນຈັກໄດ້ຜ່ານທາງອິນເຕີເນັດເຊັ່ນ: Google, Youtube ແລະ ອື່ນໆ.
ອາຊີບທີ່ໃກ້ຄຽງ
-
ວິສະວະກອນອຸກສາຫະກໍາ
-
ວິສະວະກອນວັດສະດຸ
-
ວິສະວະກອນໄຟຟ້າ
ຄໍາແນະນໍາການພັດທະນາຕົນເອງ
-
ສຶກສາກ່ຽວກັບກົນໄກການເຮັດວຽກຂອງເຄື່ອງກົນຈັກຕ່າງໆ
-
ຝຶກຝົນທັກສະທາງຄະນິດສາດ ແລະ ຟີຊິກ
-
ຮຽນຮູ້ກ່ຽວກັບລະບົບການຜະລິດຜ່ານທາງອິນເຕີເນັດຕ່າງໆ
-
ພັດທະນາທັກສະຂອງຕົນເອງກ່ຽວກັບຄອມພິວເຕີໂດຍສະເພາະແມ່ນການອອກແບບ ແລະ ການຂຽນໂປຣແກຣມ
ຊ່ວງເວລາໃນການເຮັດວຽກ
-
ຂຶ້ນກັບບໍລິສັດ ຫຼື ໂຮງງານທີ່ວິສະວະກອນເຮັດວຽກເປັນຄົນກໍານົດ
bottom of page