top of page
ຊາວປະມົງ
ນິຍາມອາຊີບ
ຊາວປະມົງ ແມ່ນຜູ້ທີ່ມີຄວາມຊໍານານກ່ຽວກັບການຫາ ຫຼື ລ້ຽງສັດນ້ຳ ເພື່ອເອົາມາຂາຍສ້າງລາຍໄດ້ໃຫ້ກັບຕົນ ເອງ, ຄອບຄົວ ແລະ ຕອບສະໜອງອາຫານຕາມຄວາມຕ້ອງການຂອງຄົນໃນສັງຄົມ ເຊັ່ນ: ປາ, ປູ ຫຼື ສັດນ້ຳປະເພດຕ່າງໆ ທີ່ບໍ່ແມ່ນສັດນ້ຳທີ່ຫວງຫ້າມ. ໃນບາງພື້ນທີ່ຜູ້ທີ່ປະກອບອາຊີບເປັນຊາວປະມົງຈະຕ້ອງມີໃບອະນຸຍາດໃນການຫາປາຢ່າງຖືກຕ້ອງ.
ການເຮັດວຽກ
ລັກສະນະວຽກ
ໃນເມື່ອກ່ອນລັກສະນະວຽກຂອງຊາວປະມົງໃນປະເທດເຮົາ ແມ່ນຈະມີການອອກໄປຫາສັດນ້ຳ ໂດຍສະເພາະແມ່ນປາຕາມທຳມະຊາດ. ສ່ວນໃຫຍ່ອາຊີບນີ້ແມ່ນຈະເຮັດເປັນຄອບຄົວ, ສະມາຊິກພາຍໃນຄອບຄົວຈະພາກັນອອກເດີນທາງຜ່ານເຮືອເພື່ອຫາປາ ອາດເປັນໄລຍະເວລາ 2-3 ມື້ ເມື່ອໄດ້ປາແລ້ວຈຶ່ງກັບມາ ເພື່ອເອົາມາຂາຍໃຫ້ພໍ່ຄ້າແມ່ຄ້າ. ໃນປັດຈຸບັນ, ເມື່ອປະຊາກອນປາໃນທໍາມະຊາດຫຼຸດໜ້ອຍລົງ ມີຫຼາຍຄົນທີ່ຫັນມາເຮັດການປະມົງທີ່ຖາວອນ ແລະ ເຮັດໃນດ້ານທຸລະກິດຫຼາຍຂຶ້ນ ເປັນຕົ້ນແມ່ນຫັນມາລ້ຽງສັດນ້ຳຫຼາຍຂຶ້ນ ເຊັ່ນ: ເຮັດບໍ່ລ້ຽງກຸ້ງ, ເຮັດກະຊັງປາ, ໜອງປາ ແລະ ອື່ນໆ.
ໜ້າທີ່ຮັບຜິດຊອບ
-
ໃນກໍລະນີທີ່ຫາປາຕາມທໍາມະຊາດ: ກຽມອຸປະກອນເພື່ອໃຊ້ໃນການຫາປາ, ຫາປາດ້ວຍວິທີຕ່າງໆຕາມຄວາມຊໍານານ ແລະ ຖືກຕ້ອງຕາມກົດໝາຍ, ເກັບຮັກສາປາໃຫ້ສົດເພື່ອນໍາມາຂາຍ, ສ້ອມແປງອຸປະກອນໃນການຫາປາເມື່ອເກີດການເປ່ເພ, ແປຮູບປາ ເຊັ່ນ: ເຮັດປາແຫ້ງ, ປາສົ້ມ, ປາແດກ ແລະ ອື່ນໆ ເພື່ອເພີ່ມມູນຄ່າໃຫ້ກັບປາ
-
ໃນກໍລະນີທີ່ລ້ຽງສັດນ້ຳ: ມີການໃຫ້ອາຫານ, ຖ່າຍປ່ຽນນ້ຳ, ເພາະພັນສັດເພື່ອຂະຫຍາຍ, ຖ້າສັດນ້ຳສາມາດຂາຍໄດ້ກໍເອົາອອກມາຂາຍ
ສະຖານທີ່ເຮັດວຽກ
-
ຟາມ
-
ຕາມທໍາມະຊາດ, ໜອງປາ, ແມ່ນ້ຳ ເປັນຕົ້ນ ເຊິ່ງສ່ວນໃຫຍ່ແມ່ນວຽກອິດສະຫຼະ
ຜູ້ທີ່ຕ້ອງເຮັດວຽກຮ່ວມ
-
ສະມາຊິກຄອບຄົວ
-
ພໍ່ຄ້າ, ແມ່ຄ້າ
-
ຊາວປະມົງຄົນອື່ນໆ
-
ລູກຄ້າ
ທາງເລືອກອາຊີບ
ຊາວປະມົງມີທາງເລືອກອາຊີບຄື:
-
ສາມາດເປັນສ່ວນໜຶ່ງໃນການຮັກສາທຳມະຊາດໃຫ້ຍືນຍົງ ເຊັ່ນ: ເປັນຕົວແທນຊຸມຊົນ ເພື່ອປຸກລະດົມ ແລະ ເປັນສື່ກາງໃນການຮັກສາທຳມະຊາດ
-
ສາມາດເປັນເຈົ້າຂອງສະຖານທີ່ຈຳໜ່າຍສັດນ້ຳ
-
ສາມາດເປັນຄູ-ອາຈານສອນ ຫຼື ຜູ້ສົ່ງຕໍ່ຄວາມຮູ້ດ້ານສັດນ້ຳ ແລະ ວິທີການຕ່າງໆທີ່ກ່ຽວກັບການປະມົງ
ຄວາມກ້າວໜ້າທາງດ້ານອາຊີບ
ການເຕີບໂຕທາງດ້ານອາຊີບ
ເສັ້ນທາງການເຕີບໂຕຂອງສາຍອາຊີບນີ້ ສ່ວນໃຫຍ່ແມ່ນບໍ່ມີຕໍາແໜ່ງ ແຕ່ເປັນການສ້າງລາຍໄດ້ໃຫ້ກັບຕົນເອງ ແລະ ຄອບຄົວ, ບໍ່ມີການເລື່ອນຊັ້ນຄືອາຊີບອື່ນໆ ເພາະສ່ວນໃຫຍ່ຜູ້ທີ່ເຮັດອາຊີບນີ້ຈະເປັນນາຍຕົນເອງ.
ເງິນເດືອນພື້ນຖານ
(ບໍ່ມີຂໍ້ມູນ)
ແຂ່ງຂັນ ແລະ ຄວາມຕ້ອງການຂອງຕະຫຼາດແຮງງານ
ອາຊີບນີ້ເປັນອາຊີບທີ່ສັງຄົມເຮົາມີຄວາມຕ້ອງການ ເນື່ອງຈາກວ່າເປັນອາຊີບທີ່ຊອກຫາອາຫານທີ່ມີປະໂຫຍດໃຫ້ກັບຄົນໃນສັງຄົມໄດ້ບໍລິໂພກ. ໃນດ້ານການແຂ່ງຂັນຂອງຊາວປະມົງທີ່ຫາປາຕາມທໍາມະຊາດ ແມ່ນເປັນວິທີການໃນການຫາປາວ່າຄອບຄົວໃດຈະຫາປາໄດ້ຫຼາຍກວ່າກັນ. ສ່ວນໃນດ້ານການເພາະລ້ຽງແມ່ນຂຶ້ນກັບການຫາຕະຫຼາດຈັດຈໍາໜ່າຍ ແລະ ກຸ່ມລູກຄ້າ.
ຂໍ້ດີ ແລະ ຂໍ້ເສຍ
ຂໍ້ດີ
-
ໄດ້ເຮັດວຽກອາໄສຢູ່ກັບທຳມະຊາດ ໂດຍສະເພາະແມ່ນຫາປາຕາມທໍາມະຊາດ
-
ເປັນອາຊີບທີ່ສາມາດເປັນນາຍຕົນເອງໄດ້
-
ສາມາດຕອບສະໜອງອາຫານທີ່ມີຄຸນປະໂຫຍດໃຫ້ຄົນໃນສັງຄົມ
ຂໍ້ເສຍ
-
ການຫາປາແບບທໍາມະຊາດໃນປັດຈຸບັນແມ່ນຫຍຸ້ງຍາກຂຶ້ນ ເນື່ອງຈາກວ່າຈໍານວນປະຊາກອນປານັບມື້ນັບຫຼຸດໜ້ອຍຖອຍລົງ
-
ປາສ່ວນໃຫຍ່ແມ່ນຈະແຜ່ພັນຫຼາຍໃນລະດູຝົນ ເຮັດໃຫ້ລະດູແລ້ງບໍ່ຄ່ອຍພົບເຫັນປາທໍາມະຊາດຫຼາຍ
-
ເມື່ອລະດູທີ່ມີປາທໍາມະຊາດ, ປາກະຊັງມັກຈະບໍ່ຕອບໂຈດຄວາມຕ້ອງການຂອງລູກຄ້າ
-
ຂ້ອນຂ້າງມີຄວາມສ່ຽງໃນການອອກໄປປະມົງ ເພາະໃນນ້ຳມີຄື້ນ ແລະ ບາງຄັ້ງອາດມີລົມພາຍຸ ຫຼື ຝົນຕົກ
ຄຸນສົມບັດທີ່ເໝາະສົມກັບອາຊີບ
-
ມັກວຽກທີ່ໄດ້ໃຊ້ແຮງງານ
-
ມີຄວາມດຸໝັ່ນ, ອົດທົນ ແລະ ສາມາດເຮັດວຽກກາງແຈ້ງໄດ້ (ສູ້ແດດສູ້ຝົນ)
-
ມັກໃນການເດີນທາງອອກໄປຫາປາ
-
ເປັນຄົນທີ່ຊ່າງສັງເກດ
-
ສາມາດປັບໂຕໃຫ້ເຂົ້າກັບສະພາບແວດລ້ອມໄດ້
-
ບໍ່ຢ້ານນ້ຳ
ທັກສະທີ່ເໝາະສົມກັບອາຊີບ
-
ທັກສະດ້ານການລອຍນ້ຳ (ຕ້ອງເກັ່ງ)
-
ຄວາມຮູ້ກ່ຽວກັບສັດນ້ຳ ເຊັ່ນ: ບ່ອນທີ່ປາມັກອາໄສຢູ່ ຫຼື ສັດນ້ຳປະເພດອື່ນໆອາໄສຢູ່
-
ຮູ້ຈັກຊະນິດຂອງປາທີ່ຫຼາກຫຼາຍ
-
ທັກສະດ້ານການລ້ຽງ ແລະ ເບິ່ງແຍງສັດນ້ຳໃນກໍລະນີທີ່ເຮັດຟາມ
-
ທັກສະດ້ານການເຈລະຈາຕໍ່ລອງ ໂດຍສະເພາະແມ່ນເວລາທີ່ຂາຍສິນຄ້າໃຫ້ກັບພໍ່ຄ້າ, ແມ່ຄ້າ
ຄຸນຄ່າຂອງອາຊີບ
ປາ ແລະ ສັດນ້ຳປະເພດອື່ນໆ ແມ່ນອາຫານປະເພດໜຶ່ງທີ່ເຕັມໄປດ້ວຍໂປຼຕິນ ທີ່ເສີມສ້າງໃຫ້ຮ່າງກາຍຂອງເຮົາມີຄວາມແຂງແຮງ ແລະ ເຮັດໃຫ້ເຮົາມີສຸຂະພາບດີ. ຊາວປະມົງ ແມ່ນຜູ້ທີ່ສະໜອງອາຫານເຫຼົ່ານີ້ໃຫ້ກັບຄົນໃນສັງຄົມ ຖ້າຂາດຊາວປະມົງແລ້ວ ເຮົາກໍບໍ່ຮູ້ວ່າຈະສາມາດຫາເນື້ອປາທີ່ຫວານໆ, ແຊບໆ ແລະ ມີປະໂຫຍດແບບນີ້ໄດ້ຢູ່ ໃສ.
ຊ່ອງທາງການສຶກສາເພີ່ມເຕີມ
ສາຂາທີ່ກ່ຽວຂ້ອງກັບສາຍອາຊີບນີ້:
- ຄະນະການປະມົງ ມະຫາວິທະຍາໄລແຫ່ງຊາດ
ນອກນັ້ນ, ອາຊີບນີ້ຍັງສາມາດຮຽນຈົບສາຂາໃດກໍໄດ້ ຫຼື ສາມາດຮຽນຮູ້ໄດ້ດ້ວຍຕົນເອງ ເຊິ່ງຂຶ້ນກັບຄວາມມັກຮັກ ແລະ ຄວາມເອົາໃຈໃສ່. ນອກນັ້ນ, ສາມາດຮຽນຮູ້ນໍາອິນເຕີເນັດໄດ້ ເຊັ່ນ: Youtube, Google ແລະ ຊ່ອງທາງອື່ນ.
ອາຊີບທີ່ໃກ້ຄຽງ
-
ຊ່າງເພາະພັນປາ
-
ຊາວກະສິກອນ
ຄໍາແນະນໍາການພັດທະນາຕົນເອງ
-
ສຶກສາຊະນິດ ແລະ ຈຸດພິເສດຂອງປາແຕ່ລະຊະນິດ
-
ສຶກສາເລື່ອງເຄື່ອງມືທີ່ໃຊ້ງານໃນການຫາປາ
-
ສຶກສາເບິ່ງວ່າສັດນ້ຳປະເພດໃດທີ່ຄົນນິຍົມກັນຫຼາຍໃນປັດຈຸບັນ ຖ້າຈະລ້ຽງຄວນຈະລ້ຽງຫຍັງ (ສຶກສາເບິ່ງຄວາມຕ້ອງການຂອງຕະຫຼາດ)
ຊ່ວງເວລາໃນການເຮັດວຽກ
-
ອາຊີບນີ້ເປັນອາຊີບອິດສະຫຼະ ແລະ ເປັນນາຍຕົນເອງ. ດັ່ງນັ້ນ, ຂຶ້ນກັບຜູ້ທີ່ປະກອບອາຊີບນີ້ເປັນຄົນກໍານົດ
bottom of page