ນັກເຄມີ

ການເຮັດວຽກ

ລັກສະນະວຽກ

ລັກສະນະວຽກຂອງນັກເຄມີສ່ວນໃຫຍ່ແມ່ນເຮັດວຽກກ່ຽວກັບການຄົ້ນຄວ້າ, ວິໄຈ ໃນຫ້ອງປະຕິບັດການ (ຫ້ອງແລ໋ບ) ເພື່ອທົດລອງບັນດາຄຸນສົມບັດຂອງສານເຄມີ ໃຫ້ກັບບັນດາຂະແໜງການອຸດສາກະກໍາອື່ນໆ ເພື່ອນໍາໄປຜະລິດ ເຊັ່ນ: ຂະແໜງການຜະລິດເຄື່ອງອຸປະໂພກບໍລິໂພກ, ການຜະລິດເຄື່ອງສໍາອາງ, ຂະແໜງການຜະລິດຢາ ແລະ ອື່ນໆ.

ໜ້າທີ່ຮັບຜິດຊອບ

• ອອກໄປພົບລູກຄ້າ ເພື່ອຮັບຟັງຄວາມຕ້ອງການຂອງລູກຄ້າ ຫຼື ຜູ້ຈ້າງງານ (ກໍລະນີທີ່ເຮັດວຽກໃນສູນຄົ້ນຄວ້າວິໄຈ ແລະ ຮັບໂຄງການຄົ້ນຄວ້າ)

• ວິເຄາະກ່ຽວກັບຂະແໜງການທີ່ຕົນເອງເຮັດວຽກຢູ່ ເຊັ່ນ: ນັກເຄມີບາງຄົນໄດ້ມີການວິເຄາະກ່ຽວກັບນໍ້າ ເນື່ອງຈາກວ່າເຮັດວຽກຢູ່ເຂື່ອນ ເປັນຕົ້ນ

• ຄົ້ນຄວ້າ, ວິໄຈ, ພັດທະນາກ່ຽວກັບບັນດາທາດ, ຄຸນລັກສະນະ ແລະ ຄຸນສົມບັດຂອງທາດເຄມີປະເພດອື່ນໆ

• ສຶກສາກ່ຽວກັບໂຄງສ້າງທາງດ້ານຈຸລັງ, ອາໂຕມ, ໂມເລກຸນຂອງບັນດາທາດຕ່າງໆ

• ນັກເຄມີບາງຄົນມີໜ້າທີ່ໃນການຄວບຄຸມການຜະລິດຂອງໂຮງງານການຜະລິດ

• ເມື່ອສາມາດຄົ້ນຄວ້າ-ວິໄຈຜົນງານທີ່ແປກໃໝ່ ກໍນໍາເອົາຜົນທີ່ຕົນເອງວິໄຈໄດ້ມາເຜີຍແຜ່ໃຫ້ກັບຄົນໃນສັງຄົມໄດ້ຮັບຮູ້

ສະຖານທີ່ເຮັດວຽກ

• ສູນຄົ້ນຄວ້າ

• ໂຮງງານອຸດສາຫະກໍາການຜະລິດອື່ນໆ

• ເຂື່ອນໄຟຟ້າ

• ໂຮງໝໍ

• ໂຮງຮຽນ

ຜູ້ທີ່ຕ້ອງເຮັດວຽກຮ່ວມ

• ຜູ້ວິໄຈຄົນອື່ນໆ ຫຼື ທີມຄົ້ນຄວ້າ

• ຜູ້ຈັດການ ຫຼືື ຫົວໜ້າພະແນກ

• ລູກຄ້າ

• ວິສະວະກອນຄົນອື່ນໆ (ໃນກໍລະນີທີ່ເຮັດວຽກໃນຂະແໜງອຸດສາຫະກໍາ)