ທັນຕະແພດ
ນິຍາມອາຊີບ
ທັນຕະແພດ ແມ່ນຜູ້ທີ່ມີຄວາມຮູ້ກ່ຽວກັບສຸຂະພາບທາງຜົ້ງປາກເປັນຢ່າງດີ ນັບຕັ້ງແຕ່ແຂ້ວ, ຜົ້ງປາກ, ເພດານປາກ, ເຟັ້ນແຂ້ວ ເຊິ່ງເປົ້າໝາຍຂອງອາຊີບນີ້ແມ່ນການທີ່ໄດ້ຮັກສາ ແລະ ເບິ່ງແຍງຜົ້ງປາກໃຫ້ຄົນເຈັບກັບມາໃຊ້ຊີວິດປະຈຳວັນໄດ້ຢ່າງປົກກະຕິ ໂດຍການຮັກສາແມ່ນຫາວິທີທີ່ເຮັດໃຫ້ຄົນເຈັບ ເຈັບໜ້ອຍທີ່ສຸດ ແລະ ເຮັດໃຫ້ຜົ້ງປາກຂອງຄົນເຈັບກັບມາໃຊ້ງານໄດ້ດີທີ່ສຸດ.
ການເຮັດວຽກ
ລັກສະນະວຽກ
-
ທັນຕະແພດ ແມ່ນຈະເຮັດວຽກກ່ຽວກັບຜົ້ງປາກຂອງຄົນເຈັບຫຼາຍຄົນຕໍ່ມື້ ເຊິ່ງເປັນວຽກທີ່ຕ້ອງໃຊ້ສິລະປະ ແລະ ຄວາມຮູ້ດ້ານແພດປະສົມກັນ ເຊິ່ງເວລາໃນການເຮັດວຽກແມ່ນຈະຄ້າຍຄືກັນກັບແພດ ກໍຄືມີໂມງເຮັດວຽກທີ່ເປັນໂມງລັດຖະການ ແລະ ຍັງມີເວນຍາມ
-
ທັນຕະແພດຈະມີຜູ້ຊ່ວຍທັນຕະແພດຈັບອຸປະກອນໃຫ້ຕະຫຼອດການເຮັດວຽກ
ໜ້າທີ່ຮັບຜິດຊອບ
-
ສອບຖາມຄົນເຈັບເຖິງອາການເບື້ອງຕົ້ນ, ບ່ອນທີ່ເຈັບ, ປະຫວັດການຮັກສາ ແລະ ເບິ່ງແຍງຜົ້ງປາກທີ່ຜ່ານມາ ເພື່ອປະເມີນອາການຕ່າງໆ
-
ກວດເບິ່ງຜົ້ງປາກ ແລະ ແຂ້ວຂອງຄົນເຈັບດ້ວຍເຄື່ອງມືແພດ, ອະທິບາຍໃຫ້ຄົນເຈັບເຂົ້າໃຈໃນການຮັກສາ ເພື່ອຈະເລືອກວິທີຮັກສາໃຫ້ຖືກບ່ອນ ຫຼັງຈາກນັ້ນກໍໃຫ້ການຮັກສາ
-
ແນະນຳວິທີການເບິ່ງແຍງຜົ້ງປາກ ຫຼັງຈາກທີ່ຮັກສາແລ້ວເພື່ອປ້ອງກັນບໍ່ໃຫ້ເກີດຂຶ້ນອີກ
-
ປິ່ນປົວຮັກສາແຂ້ວ, ຈັດຊົງ ຫຼື ດັດແຂ້ວເພື່ອໃຫ້ເຂົ້າຮູບ
ສະຖານທີ່ເຮັດວຽກ
-
ໂຮງໝໍ ເຊັ່ນ: ໂຮງໝໍຂອງລັດ, ເອກະຊົນ, ລັດວິສາຫະກິດ
-
ຄລີນິກປິ່ນປົວແຂ້ວ
-
ຄລີນິກ ຫຼື ຮ້ານເສີມຄວາມງາມ
ຜູ້ທີ່ຕ້ອງເຮັດວຽກຮ່ວມ
-
ຄົນເຈັບ
-
ຜູ້ຊ່ວຍທັນຕະແພດ
-
ໝໍ ຫຼື ພະຍາບານພະແນກອື່ນໆ
-
ທັນຕະແພດຄົນອື່ນ
ທາງເລືອກອາຊີບ
-
ສາມາດເລືອກສະຖານທີ່ໃນການເຮັດວຽກໄດ້, ແຕ່ຖ້າຫາກວ່າມັກອາຊີບອິດສະຫຼະ ແລະ ມີຕົ້ນທຶນເປັນຂອງໂຕເອງ ກໍສາມາດເປີດຄລີນິກເປັນຂອງຕົນເອງໄດ້
-
ເປັນອາຈານສອນໃນມະຫາວິທະຍາໄລໃນສາຂາທັນຕະແພດ
ຄວາມກ້າວໜ້າທາງດ້ານອາຊີບ
ການເຕີບໂຕທາງດ້ານອາຊີບ
-
ການເຕີບໂຕຂອງອາຊີບນີ້ມີຫຼາຍດ້ານຄື: ການເລື່ອນຕຳແໜ່ງ, ການທີ່ໄດ້ໄປຮຽນຕໍ່ສະເພາະທາງ ແລະ ຍັງສາມາດເຕີບໂຕຂຶ້ນຈົນເຖິງການທີ່ສາມາດເປີດຄລີນິກເປັນຂອງຕົນເອງໄດ້. ສ່ວນໃຫຍ່ມັກມາຈາກຜົນງານ ແລະ ຄວາມຊຳນານໃນການຮັກສາ ຈົນກ້າວເປັນຜູ້ຊ່ຽວຊານສະເພາະດ້ານ.
ເງິນເດືອນພື້ນຖານ
(ບໍ່ມີຂໍ້ມູນ)
ແຂ່ງຂັນ ແລະ ຄວາມຕ້ອງການຂອງຕະຫຼາດແຮງງານ
ປັດຈຸບັນ, ສຸຂະພາບແຂ້ວກໍມີຄວາມສໍາຄັນຫຼາຍ, ບາງອາຊີບຮອຍຍິ້ມກໍມີຄວາມສໍາຄັນຕໍ່ອາຊີບ ແລະ ຫຼາຍໆຄົນກໍບໍ່ໝັ້ນໃຈກັບຮອຍຍິ້ມຕົນເອງ. ດັ່ງນັ້ນ, ອາຊີບທັນຕະແພດຈຶ່ງເປັນອາຊີບທີ່ຄົນໃນສັງຄົມຊອກຫາ, ຖ້າປະກອບອາຊີບນີ້ແມ່ນຍາກທີ່ຈະຕົກວຽກ.
ຂໍ້ດີ ແລະ ຂໍ້ເສຍ
ຂໍ້ດີ
-
ເປັນອາຊີບທີ່ສັງຄົມຕ້ອງການ ແລະ ເປັນອາຊີບທີ່ໝັ້ນຄົງ
-
ເປັນອາຊີບທີ່ເສີມສ້າງຄວາມໝັ້ນໃຈໃຫ້ກັບຫຼາຍຄົນ
ຂໍ້ເສຍ
-
ສ່ວນໃຫຍ່ແມ່ນເຮັດວຽກແຕ່ໃນຫ້ອງ, ເມື່ອຄົນເຈັບມາຫຼາຍເຮັດໃຫ້ກາຍໂມງກິນເຂົ້າ ແລະ ບໍ່ມີເວລາໃນການພັກຜ່ອນ
ຄຸນສົມບັດທີ່ເໝາະສົມກັບອາຊີບ
-
ເປັນຄົນຊ່າງສັງເກດ
-
ມີຄວາມອົດທົນສູງ ແລະ ຄວບຄຸມອາລົມໄດ້ດີ
-
ມີຄວາມລະອຽດຮອບຄອບ
-
ມີຈັນຍາບັນ, ສັດຊື່ ແລະ ມີຄວາມເຫັນອົກເຫັນໃຈຜູ້ອື່ນ ແລະ ຕ້ອງມີຮ່າງກາຍທີ່ແຂງແຮງ
ທັກສະທີ່ເໝາະສົມກັບອາຊີບ
-
ມີທັກສະດ້ານພາສາອັງກິດ ແລະ ທັກສະການສື່ສານ
-
ການເຮັດວຽກເປັນທີມ
-
ທັກສະການເປັນຜູ້ນຳ
-
ທັກສະການແກ້ບັນຫາ ແລະ ການຕັດສິນໃຈ
-
ທັກສະການຈັດການ
ຄຸນຄ່າຂອງອາຊີບ
ອາຊີບນີ້ເປັນໝໍສະເພາະທາງທີ່ບໍ່ແມ່ນໃຜກໍສາມາດຮັກສາໄດ້ ແຕ່ຕ້ອງໃຊ້ຄວາມຊຳນານ ແລະ ປະສົບການໃນການຮັກສາ; ເພາະສະນັ້ນ, ທັນຕະແພດຈຶ່ງເປັນອາຊີບທີ່ສຳຄັນຫຼາຍ ເຖິງແມ່ນວ່າເລື່ອງແຂ້ວຈະເບິ່ງຄືວ່າເປັນເລື່ອງເລັກນ້ອຍ ແຕ່ຖ້າປ່ອຍໄວ້ດົນ ອາການກໍ່ຈະລຸກລາມ ເນື່ອງຈາກແຂ້ວເປັນສູນລວມຂອງເສັ້ນປະສາດ, ອາດເຮັດໃຫ້ຕາຍໄດ້ຖ້າບໍ່ຮີບຮັກສາ ແລະ ເບິ່ງແຍງຜົ້ງປາກ.
ຊ່ອງທາງການສຶກສາເພີ່ມເຕີມ
ຂໍ້ມູນເພີ່ມເຕີມກ່ຽວກັບອາຊີບນີ້ ສາມາດຫາເບິ່ງໄດ້ຈາກ Youtube, Google, Internet... ເພື່ອເປັນຄວາມຮູ້ໃນການຮຽນທັນຕະແພດ, ຈົບການສຶກສາລະດັບມັດທະຍົມປາຍ ແລ້ວສຶກສາຕໍ່ໃນສາຂາທີ່ກ່ຽວຂ້ອງກັບທັນຕະແພດ.
ສະຖາບັນການສຶກສາທີ່ສາມາດໄປສຶກສາໄດ້ ປະກອບມີ:
- ມະຫາວິທະຍາໄລວິທະຍາສາດສຸຂະພາບ, ຄະນະທັນຕະແພດສາດ
ອາຊີບທີ່ໃກ້ຄຽງ
-
ພະຍາບານ
-
ຜູ້ວິໄຈກ່ຽວກັບພະຍາດ
-
ແພດ
-
ແພດສາຍະກຳ
-
ເພສັຊ
-
ສັດຕະວະແພດ
ຄໍາແນະນໍາການພັດທະນາຕົນເອງ
-
ກ່ອນທີ່ຈະສອບເສັງເຂົ້າສາຂານີ້ແມ່ນຕ້ອງມີຄວາມຮູ້ດ້ານເຄມີ, ຟີຊິກ, ຊີວະ ແລະ ອັງກິດ ເປັນຕົ້ນ
-
ສຶກສາເບິ່ງວິຊາທີ່ຈະສອບເສັງເຂົ້າ ແລະ ສຶກສາເລື່ອງລະບົບການຮຽນ ເພື່ອໃຫ້ໝັ້ນໃຈວ່າຕົນເອງສົນໃຈແທ້
-
ສຶກສາກ່ຽວກັບລະບົບຂອງແຂ້ວ
ຊ່ວງເວລາໃນການເຮັດວຽກ
-
ໂດຍທົ່ວໄປແມ່ນ 8:00-16:30 ຫຼື ແລ້ວແຕ່ເຄສຂອງຄົນເຈັບແຕ່ລະຄົນ. ຫາກເປີດຄລີນິກສ່ວນຕົວກໍມັກຈະຕ້ອງເຮັດວຽກໃນຕອນແລງ